ലോകത്തെ മുന്നിര ടെക് കമ്പനികളില് ഒന്നാണ് ആപ്പിള്. ആപ്പിള് തങ്ങളുടെ ഏറ്റവും പുതിയ മൊബൈല് ഫോണ് മോഡലായ ഐഫോണ് 13 ഇന്ത്യയില് നിര്മിക്കാന് ഒരുങ്ങുകയാണ്. ആപ്പിളിന്റെ കരാര് നിര്മ്മാണ പങ്കാളിയായ ഫോക്സ്കോണിന്റെ ചെന്നൈയിലെ പ്ലാന്റില് ഉല്പ്പന്നം അസംബിള് ചെയ്യാനാണു തീരുമാനം. അതിവേഗം വളരുന്ന ഇന്ത്യന് സ്മാര്ട്ട്ഫോണ് വിപണി പിടിച്ചടക്കുന്നതിനൊപ്പം രാജ്യാന്തര വിപണിയിലെ അപ്രമാധിത്യം തുടരുകയാണ് ആപ്പിളിന്റെ ലക്ഷ്യം. ഇന്ത്യന് ഉപയോക്താക്കളെ സംബന്ധിച്ചു തീരുമാനം നേട്ടമാകുമെന്നാണു വിലയിരുത്തല്.
കൊവിഡിനു ശേഷം ഇന്ത്യന് സമ്പദ്വ്യവസ്ഥയുടെ തിരിച്ചുവരവ് അതിവേഗമായിരുന്നു. റഷ്യ- യുക്രൈന് യുദ്ധം തുടങ്ങിയതോടെ മിക്ക രാജ്യാന്തര സമ്പദ്വ്യവസ്ഥകളും വലിയ തിരിച്ചടി നേരിടുകയാണ്. എന്നാല് ഇന്ത്യയില് വലിയ തിരിച്ചടികളില്ല. നിലവില് ആപ്പിള് തങ്ങളുടെ ഐഫോണുകള് അസംബിള് ചെയ്യുന്നതിനു ചൈനയെയാണ് വലിയതോതില് ആശ്രയിച്ചിരുന്നത്. എന്നാല് ചൈനീസ് വിരുദ്ധ വികാരം ലോകത്താകമാനം അലയടിച്ചു തുടങ്ങിയിട്ടുണ്ട്. അതേസമയം മെയ്ഡ് ഇന് ഇന്ത്യ ഉല്പ്പന്നങ്ങള്ക്ക് ആവശ്യക്കാര് ഏറുകയാണ്. വന്കിട കമ്പനികളെ ആകര്ഷിക്കുന്നതിനായി സര്ക്കാരിന്റെ ഭാഗത്തുനിന്നുണ്ടാകുന്ന പ്രഖ്യാപനങ്ങളും കമ്പനിയെ ആകര്ഷിച്ചു. മറ്റു രാജ്യങ്ങള്ക്കു ഇന്ത്യയുമായുള്ള വാണിജ്യ- വ്യാപാര ബന്ധങ്ങളും ആപ്പിളിനു നേട്ടമാകും.
പ്രാദേശിക ഉപഭോക്താക്കള്ക്കായി ഇന്ത്യയില് തന്നെ ഐഫോണ് 13 നിര്മ്മിക്കാനുള്ള തീരുമാനത്തില് തങ്ങള് ആവേശഭരിതരാണെന്നാണു ആപ്പിളിന്റെ പ്രസ്താവന. ഐഫോണ് 13 ഇന്ത്യയില് പ്രാദേശികമായി നിര്മ്മിക്കാനുള്ള തീരുമാനം കേന്ദ്രത്തിന്റെ പ്രൊഡക്ഷന്- ലിങ്ക്ഡ് ഇന്സെന്റീവ് (പി.എല്.ഐ) സ്കീമിന്റെ നേരിട്ടുള്ള പ്രതികരണമായി കാണാം. ഐഫോണ് 13-നൊപ്പം, രാജ്യത്തെ പങ്കാളികളായ ഫോക്സ്കോണിന്റെയും വിസ്ട്രോണിന്റെയും സഹായത്തോടെ ആപ്പിള് ഇപ്പോള് ഇന്ത്യയില് ഏറ്റവും കൂടുതല് വിറ്റഴിക്കപ്പെടുന്ന മറ്റു മോഡലുകളും പ്രാദേശികമായി നിര്മ്മിക്കുമെന്നാണു വിലയിരുത്തല്. പ്രോ മോഡലുകള് നിര്മിക്കുമോയെന്ന കാര്യത്തില് വ്യക്തതയില്ല.
ഒരു ഐഫോണ് എങ്കിലും സ്വന്തമാക്കാണമെന്ന് ആഗ്രഹിക്കുന്നവര് ഏറെയാണ് ഇന്ത്യയില്. എന്നാല് മോഡലുകളുടെ ഉയര്ന്ന വിലയായിരുന്നു ഇവര്ക്കു മുന്നിലെ പ്രതിബന്ധം. രാജ്യത്തിനകത്തു തന്നെ ഉല്പ്പാദനം ആരംഭിക്കുന്നതോടെ മോഡലുകളുടെ വില കുത്തനെ കുറഞ്ഞേക്കുമെന്നാണു വിലയിരുത്തല്. നിലവില് ആപ്പിള് ഐഫോണ് 13 ന്റെ വില 79,990 രൂപ മുതലാണ്. ഫോണുകള് ഇന്ത്യയില് തന്നെ നിര്മ്മിക്കാനുള്ള നീക്കത്തോടെ ഇറക്കുമതി തീരുവയില് 20 ശതമാനത്തിലധികം ലാഭിക്കാന് കമ്പനിക്കു സാധിക്കും. ഈ നേട്ടം മുഴുവനായും ഉപയോക്താക്കള്ക്കു കൈമാറിയില്ലെങ്കില് പോലും മോഡലുകള്ക്കു വില കുറയാനുള്ള സാധ്യതയിലേക്കാണു കാര്യങ്ങള് നീങ്ങുന്നത്.
കണക്കുകളില് ആപ്പിള് പുലി തന്നെ. എന്നാല് ഇന്ത്യയിലെ മുന്നിര പ്രീമിയം സ്മാര്ട്ട്ഫോണ് ബ്രാന്ഡ് ആയിരുന്നിട്ടു കൂടി കമ്പനിക്കു ചൈനീസ് ബ്രാന്ഡായ ഷാവോമിയടക്കമുള്ളവരെ മറികടക്കാന് സാധിച്ചിട്ടില്ല. മോഡലുകളുടെ ഉയര്ന്ന വിലയാണ് ഇതിന് ഒരു പരിധിവരെ കാരണം. ഇതു കമ്പനിക്കും അറിയാം.ആ നിലയ്ക്കു വിപണി പിടിച്ചടക്കുന്നതിനായി വന്കിട പ്രഖ്യാപനങ്ങള് ഉണ്ടാകാനുള്ള സാധ്യതയും തള്ളാനാകില്ല. ഷാവോമിക്ക് 24 ശതമാനം വിപണി വിഹിതമാണുള്ളത്. അതേസമയം നാലു ശതമാനം മാത്രം വിപണി വിഹിതമുള്ള ആപ്പിള് നിലവില് ആറാം സ്ഥാനത്താണ്. അഞ്ചാം റാങ്കിലുള്ള ഓപ്പോയ്ക്ക് 10 ശതമാനം വിഹിതമുണ്ട്.
Post your comments